გოგონა მეზობელ სახლში

რა არის ტკივილი? ყველას სხვადასხვანაირი პასუხი აქვს ამ კითხვაზე, ტკივილი ყველასთვის განსხვავებული მოვლენაა, მაგრამ იშვიათად ადამიანმა იცოდეს რა არის ნამდვილი ტკივილი.

წუხელ ნანახმა ფილმა ისე იმოქმედა ჩემზე, ემოციებით სავსემ და უფრო მეტად კი სიბრაზემ თითქმის მთელი ღამე არ დამაძინა. არ ვიცი რატომ ავირჩიე ღამე საყურებლად რამდენიმე რომანტიული კომედიიდან და მელოდრამებიდან ეს ფილმი, მაგრამ მისი ყურების განმავლობაში ერთმანეთს ცვლიდა გაოცება, გაბრაზება, ფილმის ბოლოს კი ნერვებისგან ვტიროდი, რადგან დასასრულმა შურისძიების წყურვილი არ დამიკმაყოფილა.

ფილმს საფუძვლად უდევს ნამდვილი ამბავი,  რომელიც ინდიანაპოლისში მოხდა 1965 წელს. ჯეკ კეტჩამმა დაწერა რომანი 1989 წელს “გოგონა მეზობელ სახლში”‘, რომლის შესახებაც უკვე 2007 წელს გრეგორი ვილსონმა გადაიღო ფილმი.

მოქმედება ხდება სამოციან წლებში, მაგრამ დასაწყისში ამ ამბის მონაწილე დევიდი წლების მერე იხსენებს მომხდარ მოვლენებს. ის ამბობს, რომ მისი მეორე ცოლი ბავშვობაში ველურმა კატებმა დაკაწრეს. მას მთელი სხეული ჭრილობებით ჰქონდა დაკაწრული და რამდენიმე დღე მაღალი ტემპერატურით იწვა.  მისი სიტყვებით სწორედ ეს იყო ტკივილი, მაგრამ… არავინ არ იცოდა რა იყო ტკივილი ისე როგორც დევიდმა.

დევიდი 12-13 წლის იყო, როცა მის მეზობელ ჩენდლერებთან ორი უდედმამოდ დარჩენილი და გადმოვიდა დეიდასთან საცხოვრებლად – მეგი და სუზი. დეიდა – რუთი, უცნაური ქალი იყო, სხვა მშობლებს არ ჰგავდა. ის თავის სამ მცირეწლოვან ბიჭებს უფლებას აძლევდა დაელიათ ლუდი და ესაუბრათ სექსუალურ თემებზე. დევიდი მათთან ხშირი სტუმარი იყო.

მეგი თავიდანვე მოეწონა დევიდს, განსხვავებული გოგო იყო, ლამაზი, სიცოცხლით სავსე. მშობლების დაკარგვას ძალიან განიცდიდა.

რუთი თავიდანვე განსაკუთრებული სისასტიკით ექცეოდა მეგს, გარეთ გვიანობამდე არ უშვებდა, აიძლებდა ნაკლები ეჭამა, სულ უმეორებდა რომ მსუქანი იყო, მაგრამ კოშმარი მხოლოდ ახლა იწყებოდა.

ერთხელ ღამით მეზობლებთან დარჩენილი დევიდი საშინელ სცენას შეესწრო. ოჯახს მეგი სარდაფში ჰყავდათ ჩაყვანილი, ხელებით ჩამოკიდებული და პირახვეული. რუთი სიამოვნებით ეწეოდა სიგარეტს და შვილებს მითითებებს აძლევდა, რა შეურაცხჰყოფა მიეყენებინათ გოგონასთვის. ბიჭებმა ტანზე გახადეს და შიშველი მეგი მთელი ღამე ეკიდა ხელებით სარდაფში.

დევიდს უნდოდა ეს ყველაფერი მშობლებისთვის მოეყოლა, მაგრამ რუთის შიშით ვერ ბედავდა. იმის მერე მეგი სადრაფიდან არ გამოუშვიათ, ნაცემი და სისხლიანი ეგდო იატაკზე. რამდენჯერმე ბიჭებმა რამდენიმე მეზობელი თინეიჯერის თანდასწრებით მეგი გააუპატიურეს, რუთი კი იმეორებდა, რომ ის მხოლოდ ამისთვის იყო გამოსადეგარი.

ბოლო წვეთი იყო ის, რომ რუთმა გადაწყვიტა მომავალში მეგს სექსუალური ლტოლვა რომ არ გასჩენოდა,  მისთვის გარკვეული ორგანოები უნდა მოეშორებინა. ამის მერე მეგმა გონება დაკარგა.

მსახიობები ძალიან კარგად არიან შერჩეულები, განსაკუთრებით მეგი და რუთი. ეს ამბავი ნამდვილ ამბავზე რომ არ ყოფილიყო დაყრდნობილი, ალბათ ჩემზე ასე არ იმოქმედებდა.

download – the girl next door

პარფიუმერი – ერთი მკვლელის ისტორია

ფილმის გამოსვლისთანავე ხალხის რეაქცია ორ ნაწილად გაიყო. ზუსკინდის ცნობილი ბესტსელერის ეკრანიზაცია დიდი კრიტიკის ქარცეცხლში გაატარეს, თუმცა კრიტიკოსების ნაწილმა ის მოიწონა.

მათთვის, ვისაც წიგნი წაკითხული აქვს, ფილმი ზედმეტად ჰოლივუდური და მშრალი აღმოჩნდა. ხოლო ვისაც არ ჰქონდა წაკითხული, იმათ უფრო დადებითი შეფასებები მისცეს. მე მეორე ჯგუფში აღმოვჩნდი, თავი შევიკავე წიგნის წაკითხვისგან და ვუყურე ფილმს. (მართალია 5 წლით დავიგვიანე, ფილმი 2006–ში გამოვიდა, მაგრამ სჯობს გვიან, ვიდრე არასდროს)

ტომ ტიკვერის ნამუშევარი, რომლის ფილმზე ადრეც ვისაუბრე, გადაღებული ოთხ ქვეყანაში – გერმანია, ესპანეთი, საფრანგეთი და შეერთებული შტატები.

მეთვრამეტე საუკუნის პარიზი, ბინძურ, საშინელ გარემოში, თევზით მოვაჭრე ქალი პირდაპირ დახლის ქვეშ, ტალახში და თევზების შიგნეულობაში აჩენს ბავშვს, რომელიც როგორც წინაზე გაჩენილი ბავშები მკვდარი ჰგონია, მაგრამ ბავშვი თვალს ახელს და ტირილს იწყებს.

ჟანს მაშინვე ეტყობა თანდაყოლილი უცნაური უნარი – ყნოსვა. შეუძლია მისგან მოშორებით ჭაობში ჩამალული ბაყაყის სუნიც კი ამოიცნოს. რამდენიმე მძიმე სამუშაოს შეცვლის მერე ჟანი პერფიუმერთან იწყებს მუშაობას, რომელსაც წარუმატებელი პერიოდი უდგას.

ახალგაზრდა პერფიუმერი ცოტა ხანში შეპყრობილი აღმოჩნდება იდეალური სუნამოს შექმნის მანიით, ყველგან უნიკალურ არომატს ეძებს და მიხვდება, რომ ახალგაზრდა და ლამაზ ქალიშვილებს ყველაზე სასიამოვნო სურნელი აქვთ, თანდაყოლილი, რომელიც მათი კანიდან უნდა აიღოს და შექმნას ისეთი სუნამო, რომელიც ხალხის სიყვარულს მოუპოვებს, რადგან მათგან სიძულვილის მეტს არაფერს გრძნობს.

ფილმი თითქმის ერთ ტემპში მიდის, ვერ ვიტყვით, რომ სუპერ–დაძაბულია ან ტრილერისთვის დამახასიათებელი ექშენი მიდის, მაგრამ ინერციით მიყვები და 2 საათი მალე გადის.

მთავარი როლის შემსრულებელმა ბენ ვიშოუმ ძალიან მომხიბლა. ბენი კრიტიკამ თავისი თაობის ერთ–ერთ უნიჭიერეს მსახიობად დაასახელა. ეს ფილმი მისთვის ძალიან მნიშვნელოვანი აღმოჩნდა, რადგან საშუალება მიეცა გამოეჩინა თავისი სამსახიობო ოსტატობა სულ სხვა კუთხით. შექმნა ჟან–ბატისტ გრენოუს სახე, თავისი ბინძური და ჭუჭყიანი რეალობით.

ფილმში წითური გოგონები ჭარბობენ. განსაკუთრებით მომხიბლავია რეიჩელ ჰართ–ვუდი:

და კიდევ ეს:

დასტინ ჰოფმანი და ალან რიკმანიც არიან ქასთში, თუმცა არა მთავარ როლებზე.

მომეწონა ფერები, ლამაზი ფერების ფილმია. დასასრულმა ხომ საერთოდ, ცუდად გამხადა.

ახლა აუცილებლად წავიკითხავ წიგნს და პარალელებს გავავლებ 🙂

ვისაც დაგაინტერესათ ლინკი – Perfume. The Story of a Murderer

ტრაილერი:

 

პლანეტა მელანქოლია – სიკვდილის ცეკვა

რატომღაც ძალიან მიყვარს ფილმები სამყაროს აღსასრულზე. ასეთი ფილმები როგორც წესი  მაღალიუჯეტიანი და საინტერესოა. მაგრამ არა ამ მიზეზით ველოდი ამ ფილმს, ვიცოდი რომ ტიპიური ჰოლივუდური ტრილერი არ იქნებოდა და არც შევცდი.

ლარს ვონ ტრიერის დრამა, რომლის ორი ნამუშევარი მაქვს ნანახი- დოგვილი და ანტიქრისტე. საკმაოდ შთამბეჭდავი ქასტით – კირსტენ დანსტი, კიფერ საზერლენდი, ჩემი ვამპირი ალექსანდრე სკარსგარდი თავისი მამითურთ, სტელან სკარსგარდი, შარლოტა რემპლინგი და შარლოტა გეინსბურგი. ფილმი ორ ნაწილადაა გაყოფილი. პირელი ნაწილი ერთ დაზეა – ჯასტინა, რომელსაც ქორწილი აქვს. მეორე ნაწილი მეორე დაზე – კლერი. პატარა პლანეტა, სახელად მელანქოლია დედამიწას უახლოვდება. მეცნიერების ნაწილი თვლის, რომ პლანეტა დედამიწას ძალიან ახლოს ჩაუვლის, ნაწილი კი ამტკიცებს რომ დაეჯახება. პლანეტა მელანქოლია სიკვდილის ცეკვას ასრულებს დედამიწასთან – ხან უახლოვდება, ხან შორდება.

სიუჟეტი განსაკუთრებით მეორე ნაწილში იძაბება, როცა მელანქოლია ძალიან ახლოს მოდის დედამიწასთან. კლერი, ჯასტინა და კლერის პატარა შვილი განცალკევებული რანჩოდან აკვირდებიან მოვლენების განვითარებას მას შემდეგ რაც ჯასტინა ქორწილს ჩაშლის და დასთან გადმოვა.

არასდროს არც ერთ ფილმს სამყაროს აღსასრულზე ასე არ დავუძაბივარ, მუსიკალური გაფორმება არის უძლიერესი, ერთი კინოდ ჯერ მარტო მუსიკა ღირს. ძალიან მძიმე და შთამბეჭდავია.

ამის მეასედი ემოციაც არ გამოუწვევია არც 2012-ს და არც სხვა ამ ტიპის ფილმს, მიუხედავად იმისა, რომ ფილმის ბიუჯეტი სულ რაღაც 7 მილიონი დოლარია. ისე განვიცადე ყველაფერი, თითქოს მეც იქ ვიყავი და მელანქოლია მეც მეჯახებოდა. ფილმი რომ დამთავრდა გული ისე მქონდა დამძიმებული, თითქოს მართლა მთავრებოდა ცხოვრება დედამიწაზე.

აი ლინკიც

რა მოხდება მომავალში

მომავლის ყველას სხვადასხვანაირი ვერსია აქვს და თანამედროვე ტექნოლოგიებმა რეჟისორებს მისცათ შესაძლებლობა ეს ყველაფერი კინოეკრანებზე გადმოეტანათ.

შვიდი ფანტასტიკურ–სამეცნიერო ჟანრის მაღალბიუჯეტიანი ფილმი, სადაც მოქმედება მომავალში ხდება.

7. Sunshine (2007)

მოქმედება ხდება 50 წლის მერე. მზე ნელ–ნელა ქრება და დედამიწაზე ყველაფერი იყინება. ასტრონავტების ჯგუფი მიდის მზეზე, რომ ატომური აფეთქების შედეგად დაუბრუნონ სინათლე.

როლებში – კრის ევანსი, კილიან მერფი და როუზ ბირნი.

გადმოწერა

6. I, Robot

2035 წელი, რობოტები ყოველდღიურობის შემადგენელი ნაწილი გახდნენ. პოლიციელი იძიებს დანაშაულს, რომელიც რობოტის მიერაა ჩადენილი, მაგრამ ამ საქმის უკან სხვა საიდუმლოებებს წააწყდება.

ფილმი ნომინირებულია ოსკარზე.

მთავარ როლში უილ სმიტი.

გადმოწერა

5. Equilibrium

ფუტურისტული სამყარო, სადაც ადამიანებს გრძნობების გამოვლენა ეკრძალებათ. ისინი ინექციას იკეთებენ იმისთვის, რომ ჩაკლან ადამიანური ემოციები. ამ ყველაფერს მხოლოდ ერთი ადამიანი შეეწინააღმდეგება.

როლებში – კრისტიან ბეილი, შონ ბინი, ემილი ვოტსონი.

გადმოწერა

4. Mr. Nobody

2092 წელი, 118 წლის ნემო უკანასკნელი მოკვდავი ადამიანია პლანეტაზე. ის თავისი ცხოვრების ისტორიას ჰყვება და იხსენებს წარსულს. ალტერნატიული რეალობები და სამ ნაწილად გაყოფილი ცხოვრება.

ძალიან ძლიერი და ემოციური ფილმია და ჩემი უსაყვარლესი მომღერალი და ყოფილი ქრაში, ჯარედ ლეტო ასრულებს მთავარ როლს და ძალიან წარმატებითაც, უნდა ვაღიარო, რომ ეს კაცი ბევრად უკეთესი მსახიობია, ვიდრე მომღერალი. ერთი სიტყვით ვისაც არ გაქვთ ნანახი გირჩევთ.

გადმოწერა

3.  V for Vendetta

ალტერნატიული მომავალი, თავისუფლებისთვის მებრძოლი, ასევე ცნობილი როგორც “ვ” ირჩევს ტერორისტულ ტაქტიკას და ებრძვის ტოტალიტარულ რეჟიმს.

მთავარ როლებში – ჰუგო ვევინგი და ნატალი პორტმანი.

ჰო და ეს “V” ძალიან მეცნო ავატარზე 🙂

გადმოწერა

2. I Am Legend

ისევ და ისევ პოსტაპოკალიფსური მომავალი, სადაც მთელი პლანეტა საშინელმა ვირუსმა გაანადგურა და ზომბებად აქცია. რობერტ ნევილი მარტო ცხოვრბს ცარიელ ნიუ–იორკში და ცდილობს იპოვნოს ანტიდოტი, რომელიც ამ ვირუსს გაუმკლავდება.

მთავარ როლში – უილ სმიტი.

გადმოწერა

1. The Island

2019 წელი, უტოპიური საზოგადოება, რომლებიც დახურულ სივრცეში ცხოვრობენ მიწისქვეშ და ჰგონიათ, რომ სამყარო განადგურებულია.  ხანდახან თამაშდება ლატარეა, სადაც მოგებული მშვენიერ კუნძულზე მიდის დასასვენებლად, რომელიც ასე მაცდურად ჩანს ფანჯრებიდან. სინამდვილეში კი მათ სულ სხვა მიზნებით აგზავნიან.

როლებში – ევან მაკგრეგორი და სკარლეტ იოჰანსონი

გადმოწერა

დასაწყისი, მეხუთე ელემენტი, მატრიცა, ხელოვნური ინტელექტი, მაიმუნების პლანეტა, ავატარი და სხვა აღარ მივამატე,  ისედაც ყველამ იცის 🙂

აგვისტოს 5 დღე – ამერიკული პრემიერა და კრიტიკა

19 აგვისტოს გაიმართა ომის 5 დღის ამერიკული პრემიერა და კინოთეატრებში დაიწყო ფილმის ჩვენება.

როგორც ჩვენმა ტელევიზიამ გვაუწყა, ხალხი აღფრთოვანებული დარჩა ფილმით, ცრემლმორეულები გამოდიოდნენ და ამბობდნენ, ეს ყველაფერი ხომ რეალობა იყო, სწორედ ამიტომ გამოიწვია ამხელა ემოციაო. რენე კი სხვადასხვა ტოქშოუებში საუბრობდა საქართველოს შესახებ და იმაზე, რომ ამერიკას სურდა ეს ქვეყანა წარმოეჩინა მსოფლიო ასპარეზზე.

ჩემი დამოკიდებულება ამ ფილმის მიმართ იცით, არც აღფრთოვანებული დავრჩენილვარ და არც ძალიან იმედგაცრუებული, მაგრამ ქართულ არხებზე რა თქმა უნდა კარგის მეტი არაფერი ახსენეს, ამიტომ ვნახოთ ცნობილ გაზეთებში როგორი მიმოხილვა გაუკეთეს ამერიკელმა ჟურნალისტებმა.

Lou Lumenick ნიუ–იორკ პოსტიდან წერს:

რენე ჰარლინის ფილმი ტანკებით, თვითმფრინავებით და სამხედროებით 12 მილიონიანი პროპაგანდაა რუსეთის წინააღმდეგ. ფილმში გაუგებარია რატომ უერთდება რუსეთი სეპარატისტულ სამხრეთ ოსეთს.

ჰარლინი მიმართავს ბანალურ სიუჟეტს, სადაც ამერიკელ ჟურნალისტს, რომლის როლსაც ბრიტანელი რუპერტ ფრენდი თამაშობს და მის ოპერატორს ხელში უვარდებათ მასალა რუსების წინააღმდეგ.

ფილმი მოეწონებათ იმათ, ვისაც უშინაარსო ექშენის ყურება უყვარს, და არა იმათ, ვისაც ძირითადი შინაარსი დააინტერესებთ.

New York Daily News
Joe Neumaier

რენე ჰარლინი დამარცხდა როგორც დრამის (ჟურნალისტი, რომელიც მძიმე სიტუაციაში აღმოჩნდება და მრავალ სისასტიკეს ხედავს) ასევე ომის თემაში (საქართველო–რუსეთს შორის). ემანუელა შრიკი საერთოდ ამოვარდნილია როლიდან, რენემ საწყალ კილმერსაც კი აიძულა იმაზე უარესი ყოფილიყო, რაც არის.

The New York Times
Stephen Holden

რენე ჰარლინმა საუკუნეების მანძილზე დამკვიდრებულ საომარი ფილმების შინაარსს მიმართა. აქ არ არის არაფერი ახალი. გადმოგვცემს საქართველო–რუსეთს ხანმოკლე ომს.

სცენარი გასული საუკუნეების საომარი ფილმის სცენარს მოგვაგონებს. ამ ფილმში შენ ან გმირი ხარ (ჯონათან შაეხი) ან ცუდი ბიჭი (მიკო ნოსიაენი).
NPR
Mark Jenkins

რენე ჰარლინის დაბალბიუჯტიანი ფილმი არც ინოვაციური და არც გულში ჩამწვდომი, მაგრამ ინტუიციური და მოძრავია.

ფილმის ყურებისას შეუძლებელია გააკეთო ბალანსი ან რომანტიულ ხაზზე, ან ბრძოლაზე, ყველაფერი ზედმეტადაა არეული ერთმანეთზე. ფილმის შემქმნელების სიმპათია რომ საქართველოს მხარესაა, ესეც აშკარად იგრძნობა.

ამათ გარდა გადავიკითხე ბევრი მიმოხილვები და კომენტარები. ბევრი კრიტიკის თუ დაწუნების გარდა თითქმის ყველა თანხმდება იმაზე, რომ camera work-ი ძალიან კარგია, მუდმივად მოვლენების ცენტში გამყოფებს და ძალიან რეალურად გადმოსცემს გადაღებულ მასალას.

ასე რომ, ქართულო ტელევიზიებო, უფრო კონკრეტულად კი რუსთავი 2–ო, გარდა ქებისა და აცრემლებული ხალხისა, ცოტა კრიტიკაც მოგვაწოდე ამ ფილმის შესახებ, კრიტიკა სულაც არაა ცუდი, თანაც ვიცით, რომ ეს არ არის იდეალური და ძალიან კარგი ფილმი.

მსგავსი თემები:
აგვისტოს 5 დღე – მიმოხილვა + ფოტოები
აგვისტოს 5 დღე

მკვლელობა ბენზოხერხებით და მთებს აქვთ თვალები, თუ რაღაც მსგავსი

მარტო საშინელებათა და საშინელება–მისტიკის ჟანრს ბევრი რამე აქვს საერთო, მაგრამ ბევრი რამითაც განსხვავდება. როგორც ყველგან, აქაც გვაქვს კლიშეები, რომელიც ფილმების უმრავლესობაში მეორდება.

უმეტეს შემთხვევაში იქნება:

  • რამდენიმე თინეიჯერი მანქანით მიდიან კონცერტზე.
  • დასაწყისში იქნება გზისპირა პატარა მაღაზია ან სახელოსნო, სადაც ცოტა ხნით შეჩერდებიან და რომელსაც უცნაური პატრონი ეყოლება, რომელიც ბოროტად ჩაიხითხითებს.

დავიწყოთ.

ჯესიკა, ჯონათანი, სამანტა და კობა ჯესიკას ვილაზე შეიკრიბნენ და შეზლონგებზე წამოწვნენ. ჯონათანმა კობას ზურგზე მზის საწინააღმდეგო კრემი დაასხა და მონდომებით შეუდგა ზელვას.

– ჰეი, ნახეთ, მაგარი ბილეთები დავითრიე – კობამ ჯიბიდან ცნობილი როკ–ჯგუფის, ” მწვანე ტარაკანის” ბილეთები ამოიღო და ააფრიალა – არ წავიდეთ?

ჯესიკა ჯონათანს ჩაუჯდა კალთაში, ისინი შეყვარებულები იყვნენ, სამანტა კი კობას სკოლიდან მოყოლებული უყვარდა და სულ ცდილობდა რაიმე მიზეზით ერთად ყოფილიყვნენ.

გადაწყვიტეს წასვლა. ჯონის ძველი ვარდისფერი ფურგონი გამოიყვანეს და დაქოქეს.

– გზად რამდენიმე ძალიან მიტოვებული და საშიში სოფლის გავლა მოგვიწევს, სადაც ამერიკელი სამხედროები ატომურ აფეთქებებს ატარებდნენ და შეიძლება რაღაც ანომალიებს წავაწყდეთ – გამოაცხადა კობამ. გამხიარულებულმა საზოგადოებამ ყიჟინა დასცა.

მართლაც, რამდენიმე საათის მერე ტეხასის ძველ გზაზე გავიდნენ, სადაც საგზაო ნიშნებზე ბენზოხერხიანი კაცები ეხატა და დიდი ასოებით ეწერა “აქ არ წახვიდეთ, დაგხერხავენ”

საზოგადოებამ კიდევ ერთხელ დასცა ყიჟინა და გზა გააგრძელეს.

– მოიცადეთ – თვალები მოიჩრდილა სამანტამ – იქ ვიღაცაა, ჩვენი დახმარება სჭირდება.

გზაზე ტანსაცმელჩამოხეული გოგო მოდიოდა, ყველგან სისხლები ეცხო, ჭრილობები დახეთქოდა და საშინლად გამოიყურებოდა.

– ეი, ხომ კარგად ხართ? – თავი გადაყო ჯონიმ – გინდა წაგიყვანოთ? თან გზას მიგვასწავლი.

– იქ არ წახვიდეთ – ჩაიჩურჩულა ხრინწიანი ხმით გოგომ – თორემ საშინელი სიკვდილი გელით…

– რაო? რა თქვა?

– რა ვიცი, მგონი დღეს ძველი ჰამბურგერი შევჭამეო.

ჯონი დაიჭყანა,  მხიარულად დაუქნია ხელი და სიჩქარეს მოუმატა.

შევიდნენ მიტოვებულ სოფელში. ირგვლის სიჩუმე და ნისლი იყო ჩამოწოლილი, კაცის ჭაჭანებას ვერ ნახავდით ვერსად (გადამღები ჯგუფი რამდენიმე მაცხოვრებელს მიერეკებოდა სოფლის ბოლოში, კინოს ვიღებთ და ცოტა ხანი  გვაცადეთო)

სწორედ ამ დროს დაეშვა ოთხივე საბურავი და მანქანა გაჩერდა.

– ახლა რა ვქნათ? – იკითხა ჯესიკამ და საბარგულიდან არაყი ამოიღო.

– მოიცა, სცენარს ჩავხედო.

რამდენიმე წუთიანი დუმილის მერე ფეიდ აუთი გაკეთდა, როგორ სვამენ მეგობრები, როგორ ცეკვავს ტოპლესს ჯესიკა ჯონის მუხლებზე, როგორ უყურებს კობა სამანტას გამჭვირვალე მაიკას და როგორ უთვალთვალებთ ვიღაც სახლებიდან უზარმაზარი ლინზებით.

დაღამდა, ახლა კი შეშფოთდნენ და შერიფს დაუწყეს ძებნა, სწორედ ახლა შეამჩნიეს მთელი სოფელი ცარიელი რომ იყო, მართალია რამდენჯერმე შიშველმა კაცებმა გადაურბინეს კამერას, მაგრამ მაინც.

ახლა ხვდებიან, რომ მათზე ნადირობა დაიწყო, ისმის უცნაური ხმები, ხვნეშის, სირბილის, რამდენჯერმე მწარე ამოოხვრის ხმაც გაიგონეს და დაინახეს კოჭლობით როგორ წავიდა ვიღაც.

– უნდა შევიარაღდეთ – განაცხადა კობამ და ჯონის წყლის რევოლვერი მისცა.

მშვიდად იძინებენ. პირველი მსხვერპლი ჯესიკაა. მისთვის საშინელი მანიაკი მოდის – მეტსახელად ტყავის სახე. ის საშინელი სახის დეფექტით დაიბადა და იმის მერე სულ სახეს იჭიმავს სხვადასხვა კოსმეტიკური საშუალებებით. ქოქავს თავის ბენზოხერხს და ჯესიკას ხერხავს.

კოშმარი იწყება. ჯესიკას ხელს გარეთ პოულობენ. მასზე ჯერ კიდევ დაფიქსირებულია შუა თითი.

ირგვლივ მთებზე საშინელი არსებები ირევიან, ისინი ატომურმა აფეთქებამ დაამახინჯათ და ახლა ადამიანებზე უნდათ შურისძიება.

ცოტა ხანში ჯონათანს ბრმა ნაწლავი შეტევას აძლევს და ისიც კვდება. კობა სამანტას გადასარჩენად იბრძვის, რომელსაც რამდენიმე დამუწუკებული არსება ბოროტი ხითხითით მიათრევს.

– კობაა… – ყვირის სამანტა და ირგვლივ ყველაფერს ხმა ეკარგება. შორიდან ისმის გულისცემის ხმა.  კობა შენელებული კადრებით იხედება სისხლიან ხელებზე. გულიცემა ძლიერდება და გმირული მუსიკა ედება.

– ე ბიჭო, დროზე, გათავდა ფირი – ყვირის რეჟისორი.

კობა იღებს ბენზოხერხს, რომელიც ტყავისსახას კედელზე მიუყუდებია და თვითონ ტუალეტში წასულა ღიღინით  და რამდენჯერმე ამოქოქავს ეფექტებით, მერე დაერევა ყველას და სამანტას იხსნის.

კობა და სამანტა შემაღლებულ ადგილზე დგანან და ერთმანეთს ეხვევიან. მოდის სამაშველო რაზმი და თბილ ადიელებში ახვევენ წყვილს.

კადრი ბნელდება.

6 თვის მერე…

სოფელში დიდი ფურგონი შემოდის. იქაც თინეიჯერები სხედან და “მწვანე ტარაკნის” მაისურები აცვიათ.

– ჯანდაბა, კიდევ? – ოხრავს რეჟისორი და აპარატურას მოათრევს.

 

insbired by – the texas chainsaw massacre 1-2, the hills have eyes 1-2 და მრავალი სხვა

მსგავსი პოსტი:

სასაფლაოს წყევლა – საშინელებათა ფილმის შედევრი

წითელქუდა – შავი ზღაპარი დიდებისთვის

ტყიდან გოგონა მორბოდა, გრძელ ქერა თმებს ქარი უფრიალებდა, ხელში კალათა ეჭირა.

– ვალერია, სად იყავი? რა გინდოდა ტყეში? – დედამ კალათა ჩამოართვა და გოგონა შეათვალიერა – შენ რა, არ იცი, რომ ტყეში მგელმა დაიდო ბინა, რომელიც ყველას გვაშინებს? რომელიც მაქციაა და დღე შეიძლება ყველა ჩვენთაგანი იყოს?

– ვიცი დედა, მაგრამ მე მისი არ მეშინია.

ვალერიამ წითელი მოსასასხამი კარებთან დაკიდა და კალათიდან სიგარეტის კოლოფი ამოიღო.

დედამ უკმაყოფილოდ გააქნია თავი და ქოხიდან გავიდა.

პატარა სოფელში პანიკა იყო ატეხილი. ყოველ ღამე თავს საშინელი მგელი ესხმოდათ თავს და კლავდა მაცხოვრებლებს. მერე კმაყოფილი იფხანდა ქოჩორს და ღიღინით მიდიოდა ტყეში. საშინელება იყო.

– ეი, ვალერია, არ გინდა სადმე განვმარტოვდეთ? – ღიმილით მიუახლოვდა სიმპათიური და დაკუნთული მეტყევე გოგონას, რომელმაც დაიმორცხვა და სიგარეტი ჩააქრო.

– ჰანს, ხომ იცი, რომ მაქცია ყველგან შეიძლება იყოს, ის მხოლოდ ღამე იქცევა მგელად, ფრთხილად უნდა ვიყოთ.

– ვიცი – უთხრა ჰანსმა და გამოჩრილი კუდი დამალა.

სოფელში ზარების რეკვა ატყდა. უკვე ღამდებოდა და გარეთ ყოფნა საშიში ხდებოდა.

ვალერიას ბოლო ღერი გაუთავდა და ვეღარ ითმენდა. ბოლოს შეიგინა,  მოიხვია წითელი მოსასხამი, რომელსაც კაპიშონი არ ჰქონდა და წითელქუდას რატომ ეძახდნენ, თვითონაც ვერ გაერკვია, და გაუდგა გზას.

ნელა მიდიოდა სიბნელეში. უკნიდან ფეხის ხმა ესმოდა. შემოტრიალდა, მაგრამ არავინ ჩანდა. იფიქრა მომეჩვენაო, მაგრამ რამდენიმე წუთში ისევ განმეორდა. სწრაფად შებრუნდა და ხის უკან გამოშვერილი ბანჯგვლიანი ფეხები დაინახა.

– ჰეი – იყვირა ვალერიამ –რომელი ხარ.

მგელს ეგონა ვალერია ვერ ხედავდა და კმაყოფილი ხითხითებდა, თან ფეხებს აქნევდა.

– მე შენს გონებაში ვარ… – ხმა დაიბოხა მაქციამ და ექოს ეფექტი მისცა – ვარ… არ…რ….

– გონებაში კი არა, გამხმარი ხის უკან დგახარ.

მგელი გამოვიდა და ვალერიას მიუახლოვდა.

– ო ღმერთო, რატომ გაქვს ამხელა თვალები?

– იმიტომ, რომ კარგად დაგინახო…

– რატომ გაქვს ამხელა ყურები?

– იმიტომ რომ კარგად მოგისმინო…

_ რატომ გაქვს ამხელა ცხვირი?

– ნუ, კი ვიფიქრე რინოპლასტიკის გაკეთება, მაგრამ მერე  მითხრეს შენს ინდივიდუალიზმს დაკარგავო და რა ვიცი… ჰოდა, რას ამბობდი?

– რატომ გაქვს ამხელა პირი?

– იმიტომ რომ კარგად შეგჭამო… – ჩაიღრინა მგელმა და სენდვიჩის პურები შუაზე გადახსნა.

ვალერიამ იკივლა და გაქცევა დააპირა, მაგრამ მგელს ბებიის ჯოხი მოხვდა თავში.

მოიცა, ბებია რომ აქამდე არ გვიხსენებია? – თავი მოიქექა რეჟისორმა და სცენარს ჩახედა.

– ვერავინ გაბედავს ჩემი შვილიშვილის შეჭმას – იყვირა ბებიამ და წიხლი ამოსცხო.

ვალერიმ და ბებიამ მგელს ხელები დაუბეს და ხეზე მიაკრეს.

კადრი შორეული უდაბნოდან. გაკვირვებული მონადირე ხელებს შლის გაოცებული. 

– უი, მონადირე დაგვავიწყდა – ამბობს რეჟისორი და ზღაპარს ფურცლავს. 

ფინალური სცენა

თენდება და მგელი ერთ–ერთ მათ თანასოფლელად უნდა გადაიქცეს. დაძაბული ვალერია და ბებია უყურებენ.

– იქნებ დედაა? ან მამა? ან იქნებ სულაც ჰანსია? ან იქნებ… იქნებ მე ვარ?

 რეჟისორი ფიქრობს, ფიქრობს, იმდენს ფიქრობს, რომ ბოლოს ბეზრდება და მიდის.

– ვალერია – ყვირის დედა.

– აქ ვარ – ბოხი ხმით ამბობს ვალერია და სიგარეტს აბოლებს.

inspired by red riding hood 2011

ბოლოს ნანახი სამი საშინელებათა ფილმი

თუ ჩემსავით მოიწყინეთ და გიყვართ ეს ჟანრი, მაშინ წარმოგიდგენთ რამდენიმე საშინელებათა ფილმს, რომელსაც ბოლოს ვუყურე და რომლებიც ნაკლებად არიან ცნობილები და დიდი შანსია ნანახი არ გქონდეთ.

The Reaping (2007)

ჰილაკი სვონკის გმირი იძებს რელიგიურ საკითხებთან დაკავშირებულ უცნაურ მოვლენებს და ყველაფერს თავის ახსნას უძებნის. ერთ დღეს მას მოაკითხავს ახალგაზრდა მამაკაცი და ეტყვის, რომ მათ პატარა სოფელში მდინარე სისხლად იქცა და მალე ღვთის რისხვა დაატყდებათ თავს, ამაში ბრალს კი პატარა გოგოს სდებენ და მოკვლას უპირებენ.

download

Creep 2004

ბრიტანული ფილმი, რომლის მოქმედებაც ლონდონში მიმდინარეობს. კეიტი წვეულებიდან მიდის და მეტროში ხვდება. მატარებლის ლოდინში რამდენიმე წუთი ჩაეძინება და როცა გაიღვიძებს, მთელი მეტრო ცარიელია, გასასვლელი კი ჩაკეტილი. კეიტი აღმოაჩენს, რომ მეტროს ბნელ გვირაბებში საშინელი არსება დადის, შორეულ კუთხეებში კი ქირურგიული ოთახებია განლაგებული, სადაც ადრე ექსპერიმენტებს ატარებდნენ.

download

The Hole 2001

ლიზი კოლეჯის მოსწავლეა, რომელიც ძალიან არის შეყვარებული თავის კლასელ მაიკზე, მაგრამ ის პოპულარული ბიჭია სკოლაში და ყურადღებას არ აქცევს. დასვენებებზე ის და თავისი მეგობარი გადაწყვეტენ წავიდნენ ტყეში ომისდროინდელ ბუნკერში, სადაც წვეულების მოწყობას შეძლებენ და მშობლებიც ვერ მიაგნებენ. ლიზს რა თქმა უნდა ეს იდეა მოსწონს.

კოშმარი მაშინ იწყება, როცა კარები იკეტება და მის გაღებას ვერ ახერხებენ, ბუნკერში კი საჭმელიც მთავრდება და წყალიც…

ტორა ბირჩი, კირა ნაითლი და დესმონდ ჰარინგტონი (დექსტერში დეტექტივი ქვინი)

გადმოწერა

აგვისტოს 5 დღე – მიმოხილვა + ფოტოები

სანამ ტექსტის კითხვას დაიწყებდეთ, ვისაც ფილმი არ გაქვთ ნანახი, არ არის რეკომენდირებული, შეიცავს უამრავ სპოილერს + ფოტოებს ფილმიდან.
Continue reading

როცა უცნობი რეკავს…

– ჯენიფერ, ძიძა მოვიდა, წასვლის დროა – გასძახა ქმარმა მეუღლეს და პირველ სართულზე ჩავიდა.

ამანდა მორცხვად იდგა კარებთან, სულ რამდენიმე დღეა რაც პიტერსონებთან დაეწყო მუშაობდა. თან სწავლობდა და თან ბავშვების მოვლით დამატებით შემოსავალს იღებდა.

ჯენიფერი და ტომი უკვე 15 წელია ცოლ–ქმარი იყვნენ, შვილები გვიან შეეძინათ, ახლა ორი პატარა ჰყავდათ და ერთმანეთს ისეთ ყურადღებას ვეღარ უთმობდნენ, როგორსაც ადრე, ამიტომ გადაწყვიტეს ერთი საღამო კინოში წასულიყვნენ მარტო ისინი და ბავშვები გვიანობამდე ძიძასთან დაეტოვებინათ.

– თუ რამე მოხდა, მაშინვე დაგვირეკე – ჯენიფერმა ჩანთა აიღო და ამანდას მიუბრუნდა – კარები კარგად ჩაკეტე.

პიტერსონების სახლი პატარა სასახლეს ჰგავდა, მაგრამ ძალიან ძველი და ბნელი შენობა იყო,  უამრავი ოთახებით, რომელსაც არავინ იყენებდა. პიტერსონები დიდი ხანია ამ სახლის გაყიდვას აპირებდნენ.

ამანდამ კარები ჩაკეტა და ბავშვების ოთახში ავიდა. პატარებს უკვე ეძინათ. შუქი ჩააქრო და პირველ სართულზე ჩამოვიდა, ტელევიზორი ჩართო და დივანზე მოიკალათა.

ტელეფონის ზარი გაისმა. დარწმუნებულმა იმით, რომ ჯენიფერი რეკავდა, ყურმილი აიღო.

– დიახ მისის პიტერსონ.

– …

ხმას არავინ იღებდა, მარტო მძიმე სუნთქვის ხმა ისმოდა.

– გისმენთ…– გაიმეორა ამანდამ.

– შენს ადგილზე ბავშვებს ვნახავდი – გაისმა კაცის ხმა და მას უცნაური შრიალი მოყვა. კაცმა ყურმილი დაკიდა.

გაოცებულმა ამანდამ აქეთ–იქით მიმოიხედა, ვიღაცა ბოროტად ეხუმრებოდა. სასწრაფოდ აირბინა მეორე სართულზე და ოთახის კარი შეაღო. ბავშვებს ეძინათ.

თავი გაიქნია და დაბლა ჩამობრუნდა. იფიქრა ალბათ ვინმე ნაცნობმა გაიგო ძიძად რომ ვრჩები და ჩემი შეშინება გადაწყვიტაო.

ისევ ტელეფონის ხმა გაისმა.

– ეს სულაც არაა სასაცილო – გაბრაზებული ხმით უპასუხა ტელეფონს. ისევ უცნაური შრიალი ისმოდა.

– ბავშვები შეამოწმე – გაიგო ისევ ის საშინელი ხმა შორიდან და ტანში გააჟრჟოლა. ეს ამბავი არ მოსწონდა.

– ვინ ხარ, რა გინდა?

უცნობმა ჩუმად ჩაიცინა ნაწყვეტ–ნაწყვეტ და გათიშა.

ახლა უკვე ნამდვილად შეეშინდა, ეს ყველაფერი ნაცნობის ხუმრობას არ ჰგავდა. სასწრაფოდ 911–ზე დარეკა და ოპერატორს ამ ზარების შესახებ მოუყვა.

– როცა კიდევ დარეკავს ეცადეთ ცოტა ხანი შეაყოვნოთ მისს, ასე მის ადგილმდებარეობას დავადგენთ – უთხრა ოპერატორმა.

აკანკალებული დაჯდა დივანზე და ტელევიზორი გამორთო. სახლის ირგვლივ არავინ ჩანდა, კარები საიმედოდ იყო ჩაკეტილი,  ვერავინ შემოვიდოდა. ისევ თავს იმშვიდებდა, რომ ვიღაც უბრალოდ ბოროტად ხუმრობდა.

ისევ საძულველი ზარის ხმა მოისმა. უცნობი ნომერი.

– არაფერს აკეთებ იმისთვის რომ ბავშვები გადაარჩინო – ჩასჩურჩულა უცნობმა.

– მოიცადე, არ გათიშო, მითხარი რა გინდა.

– მინდა რომ ბავშვების ოთახში ახვიდე და შეამოწმო, იქ არიან თუ არა…

– ბავშვები კარგად არიან და სძინავთ. მათ ვერაფერს დაუშავებ.

ისტერიული სიცილი გაისმა. უცნობი საშინელი ხმით იცინოდა.

– ძალიან მალე – უთხრა კაცმა და გათიშა.

ის იყო ამანდა მეორე სართულზე აპირებდა ასვლას, რომ ოპერატორმა დაურეკა.

– მისს, გადავამოწმეთ ნომერი, სასწრაფოდ დატოვეთ სახლი, ადამიანი, რომელიც გირეკავთ იმავე სახლში იმყოფება, სადაც თქვენ ხართ, გიმეორებთ, სასწრაფოდ დატოვეთ სახლი, ჯგუფი უკვე გამოვგზავნეთ.

სისხლი ძარღვებში გაეყინა, ტელეფონი ხელიდან გაუვარდა. მეორე სართულიდან მძიმე ნაბიჯების ხმა ისმოდა.

“ძალიან მალე” ჩაესმა უცნობის ხმა და კარებს მივარდა.

უკნიდან ძლიერი ხელი სწვდა და ყელში მოუჭირა.

– ხომ გითხარი ბავშვები შეამოწმე–თქო – ჩაესმა ნაცნობი ხმა და ყელიდან გაურკვეველი ბგერები ამოუვიდა.

გარეთ პოლიციის მანქანების სიგნალების ხმა მოისმა. კაცმა ხელი გაუშვა. პანიკაში მყოფი ამანდა კარებს ეცა და გარეთ გავარდა.

პოლიციელებმა ბავშვების ოთახში დიდი სისხლიანი ცული იპოვნეს, ბავშვები კი კარადაში იყვნენ დამალულები და ისტერიულად ტიროდნენ. ფანჯარა გატეხილი იყო, ყველგან მინის ნამსხვრევები ეყარა. მანიაკის კვალს ვერსად მიაგნეს.

ლეგენდა, რომლის მიხედვითაც საკმაოდ საინტერესო ფილმია გადაღებული

when a stranger calls